ნინო ჟვანია: მოვისმინე კულტურის მინისტრის განცხადება, რომელშიც ის კონსერვატორიის ხელმძღვანელობის შეცვლას გვპირდება და მთელი დღეა მძიმე გულით დავდივარ…
0
“არ ვიცი, რამდენად იცით კონსერვატორიის დაარსების ისტორია, მაგრამ თბილისის სამუსიკო სასწავლებელი, რომელსაც რუსეთის საიმპერატორო სამუსიკო საზოგადოება კურირებდა, დიდხანდ ცდილობდა, კონსერვატორიად (ევროპული ტიპის უმაღლეს სასწავლებლად) გადაქცეულიყო. ჯერ კიდევ 1891 წელს დაიბადა ეს იდეა, რომელსაც რუსეთის სამუსიკო საზოგადოება კატეგორიულად ეწინააღმდეგებოდა – კონსერვატორიის სტატუსი მეტ დამოუკიდებლობას მიანიჭებდა სასწავლებელს. ბრძოლა დამოუკიდებლობისთვის 26 წელს გაგრძელდა! რუსეთში დაწყებული რევოლუციური არეულობით ისარგებლეს მაშინ სასწავლებლის მესვეურებმა და 1917 წელს 1 მაისს სხდომაზე თბილისის კონსერვატორიის დაარსებას (რუსეთის სამუსიკო საზოგადოების გვერდის ავლით) უყარეს კენჭი. ვამარტივებ ამ საინტერესო პროცესს (ვისაც გაინტერესებთ, იხ. არჩილ მშველიძის “სამუსიკო განათლება საქართველოში”), მაგრამ მთავარი იდეა ისაა, რომ ჩვენ დავასწარით საქართველოს დამოუკიდებლობას და ჩვენს ქვეყანაზე ადრე მოვიპოვეთ ის!
რაც ეს ისტორია გავიგე, იმის შემდეგ განსაკუთრებით ვამაყობ ჩვენი კონსერვატორიით! 2005 წლიდან ვმუშაობ იქ და სულ ვგრძნობდი, რომ “ჩვენი თავი ჩვენადვე გვეყუდნის”, მეტ-ნაკლებად! დღეს კი მოვისმინე კულტურის მინისტრის განცხადება, რომელშიც ის კონსერვატორიის ხელმძღვანელობის შეცვლას გვპირდება და მთელი დღეა მძიმე გულით დავდივარ…
კონსერვატორიის წესდების თანახმად, რექტორს ირჩევს აკადემიური საბჭო, საბჭოს კი – აკადემიური პერსონალი. და მათ, რამდენადაც ჩემთვის ცნობილია, ვერ უნდა ცვლიდეს მინისტრი. ამდენი ხანია ამას ვახერხებთ. ხარვეზები დღეს რომელ უწყებას ან ორგანიზაციას არ აქვს? მაგრამ ფაქტია, რომ აკრედიტაციის პროცესი ამ ხელმძღვანელობით ღირსეულად გავიარეთ (დასკვნა ჯერ არ მოსულა, მაგრამ გასაუბრებებზე არ მტოვებდა შეგრძნება, რომ როგორც ქართველი, ისე უცხოელი ექსპერტები დიდი სიმპათიით იყვნენ განწყობილნი). ფაქტია, რომ წლებია საქართველოს ვუზრდით მსოფლიო მასშტაბის ვარსკვლავებს და პროფესიონალებს (სპორტის რამდენიმე სახეობის გარდა, რომელი სფერო დაიკვეხნის ასეთი მიღწევებით?!). თან ვაკეთებთ ამას აი მართლა კაპიკებზე (მათ შორის – ჩვენი ხელმძღვანელობა)!
ამიტომ, იქნებ გვაცალონ ჩვენი ხარვეზების გამოსწორება და მოგვიმატონ ხელფასები?! თორემ მთელი დღეა ემიგრაციაზე მეფიქრება… თუ “გარეგან ემიგრაციაში” ვერ გავაღწიე, “შინაგან ემიგრაციაში” მაინც გავემგზავრები… იქ მაინც მეყუდნის ჩემი თავი ჩემადვე…” – წერს სოციალურ ქსელში თბილისის კონსერვატორიის ასოც. პროფესორი, პიანისტი ნინო ჟვანია.
ცნობისათვის, პარლამენტში ანგარიშის წარდგენისას თეა წულუკიანმა თბილისის სახელმწიფო კონსერვატორიაში ჩასატარებელი რეფორმის აუცილებლობას გაუსვა ხაზი და თქვა, რომ კონსერვატორია ვერ უზრუნველყოფს სრულფასოვანი სახელოვნებო განათლების მიწოდებას სტუდენტებისთვის.“თბილისის სახელმწიფო კონსერვატორიაში რეფორმაა, ბატონებო და ქალბატონებო განსახორციელებელი, ვინაიდან დღევანდელი თბილისის სახელმწიფო კონსერვატორია უფრო მაღალი ხარისხის სახელოვნებო განათლებას უნდა აწვდიდეს ჩვენს სტუდენტებს, რასაც ის, სამწუხაროდ, ვერ ახერხებს” – აღნიშნა მინისტრმა.
კულტურის მინისტრს, თეა წულუკიანს აღნშნული განცხადების გამო აკრიტიკებენ.