თეთრი სახლი ისრაელს დამატებით დახმარებას უგზავნის
თეთრმა სახლმა განაცხადა, რომ შეერთებული შტატების პრეზიდენტმა ჯო ბაიდენმა ისრაელს დამატებითი დახმარება გაუგზავნა.
თეთრი სახლის განცხადებაში ასევე ნათქვამია, რომ ეროვნული უსაფრთხოების სფეროს წარმომადგენლებმა პრეზიდენტს და ვიცე-პრეზიდენტ კამალა ჰარისს მიაწოდეს ინფორმაცია ისრაელში მიმდინარე შეტაკებების შესახებ.
„თეთრი სახლის თანამშრომლები გააგრძელებენ მჭიდრო კონტაქტს ჩვენს ისრაელელ პარტნიორებთან. ეროვნული უსაფრთხოების გუნდები თანამშრომლობენ ისრაელელებთან და მათ მოკავშირეებთან მთელს რეგიონში“, - განაცხადა აშშ-ის ადმინისტრაციამ.
დღესვე პენტაგონმა განაცხადა, რომ ისრაელში სიტუაციის გაუარესების გამო, შეერთებული შტატები ხმელთაშუა ზღვის აღმოსავლეთ ნაწილში აგზავნის ავიამზიდ Gerald Ford-ის მოიერიშე ჯგუფს.
მასში შედის აშშ-ის სამხედრო-საზღვაო ძალების ავიამზიდი USS Gerald Ford-ი, Ticonderoga-ს კლასის მართვადი რაკეტებიანი კრეისერი USS Normandy, ასევე სამხედრო ხომალდები Arleigh-Burke კლასის მართვადი რაკეტებით, გემები USS Ramage-ი, USS Carney და USS Roosevelt-ი, განაცხადა აშშ-ის თავდაცვის მინისტრმა ლოიდ ოსტინმა.
„ჩვენ ასევე გადავდგით ნაბიჯები რეგიონში საჰაერო ძალების F-35, F-15, F-16 და A-10 გამანადგურებლების ესკადრილიების გასაძლიერებლად“, - დასძინა ოსტინმა.