აშშ-ში გარდაიცვალა ფეტულა გიულენი, თურქეთის პრეზიდენტ ერდოანის ცნობილი ოპონენტი
გიულენის გარდაცვალების შესახებ სოციალურ ქსელ X-ში წერს ვებსაიტი Herkul-იც, რომელიც სისტემატურად აქვეყნებდა ფეტულა გიულენის ქადაგებებს. საიტის თანახმად, გიულენი 20 ოქტომბერს, საღამოს, საავადმყოფოში გარდაიცვალა.
თურქეთის ხელისუფლება 1999 წლიდან აშშ-ში მცხოვრებ ფეტულა გიულენს ადანაშაულებდა 2016 წლის არშემდგარი სამხედრო გადატრიალების ორგანიზებაში, რასაც ანკარის თანახმად, 250 ადამიანის სიცოცხლე შეეწირა. გიულენი ბრალდებას უარყოფდა და პრეზიდენტ ერდოანის ხელისუფლებას ადანაშაულებდა პოლიტიკურ დევნაში.
2016 წლის სამხედრო გადატრიალების მცდელობის საქმეზე თურქეთში დააპატიმრეს 70 ათასზე მეტი ადამიანი, მათ შორის ჟურნალისტები, სამხედროები, მასწავლებლები და საჯარო მოხელეები და 130 ათასამდე სამსახურიდან დაითხოვეს.