სომხეთის მთავრობა ამკაცრებს სასჯელს სამხედრო სამსახურიდან თავის არიდებისთვის
სომხეთის მთავრობა სავალდებულო სამხედრო თუ ალტერნატიული სამსახურისგან თავის არიდებისთვის სასჯელის გაზრდას ითხოვს. ამის შესახებ იუწყება რადიო თავისუფლების სომხური სამსახური, რომლის თანახმად, ცვლილება ითვალისწინებს სასჯელის გაზრდას ორიდან ხუთ და სამიდან ექვს წლამდე.
სამხედრო გადამზადების კურსებზე თავის არიდების პასუხისმგებლობა იზრდება იმ მოქალაქეებისთვის, რომლებმაც სამხედრო სამსახური უკვე მოიხადეს. მაქსიმალურად იზრდება როგორც ფულადი ჯარიმა, ისე სასჯელი, რომელიც ერთიდან სამ წლამდე ვადით თავისუფლების აღკვეთას ითვალისწინებს.
თავის დასაბუთებაში მთავრობა აღნიშნავს, რომ ეს შეზღუდვები მიზნად ისახავს როგორც სამხედრო სამსახურიდან თავიდან არიდების, ისე სამხედრო გადამზადების პროგრამებზე უარის თქმის შემთხვევების რაოდენობის შემცირებას.