„ბლუმბერგის“ ცნობით, ჩინეთის ავიაკომპანიები „ბოინგების“ ყიდვას შეაჩერებენ

ჩინეთის ხელისუფლების განკარგულებით, ამ ქვეყნის ავიაკომპანიებმა უნდა შეწყვიტონ ამერიკული კომპანია „ბოინგის“ მიერ წარმოებული თვითმფრინავების შესყიდვა.

ამის შესახებ ინფორმაციას „ბლუმბერგი“ ავრცელებს, ინფორმირებულ წყაროებზე დაყრდნობით.

ცნობაში ნათქვამია, რომ ეს განკარგულება პასუხია აშშ-ის მიერ ჩინურ საქონელზე 145%-იანი ტარიფების დაწესებაზე. სამშაბათს დილით „ბოინგის“ აქციები 2,5%-ით დაეცა.

გარდა ამისა, პეკინმა უბრძანა ჩინურ ავიაკომპანიებს, შეაჩერონ ამერიკული კომპანიებისგან ნებისმიერი საავიაციო აღჭურვილობისა და კომპონენტების შესყიდვა. ჩინეთის მთავრობა ასევე განიხილავს მხარდაჭერის უზრუნველყოფას იმ ავიაკომპანიებისთვის, რომლებიც იჯარით იღებენ „ბოინგის“ თვითმფრინავებს და ახლა მზარდი ხარჯები აქვთ აშშ-ის ახალი ტარიფების გამო, - წერს „ბლუმბერგი“.