სულ მცირე, 26 ადამიანი დაიღუპა ღაზაში ისრაელის თავდასხმების შედეგად
ისრაელმა საჰაერო დარტყმა განახორციელა ღაზის სექტორის ჩრდილოეთით, ჯაბალიაში მდებარე პოლიციის განყოფილებაზე. ადგილობრივი ხელისუფლების ცნობით, დაიღუპა, სულ მცირე, 10 ადამიანი. თავად ისრაელი აცხადებს, რომ დაარტყა ჰამასის და ისლამური ჯიჰადის სამეთაურო ცენტრს.
ადგილობრივი მედიკოსების ცნობით, ისრაელის ორი რაკეტა მოხვდა პოლიციის განყოფილებას, რომელიც მდებარეობს ბაზრის მახლობლად, რის შედეგადაც ათობით ადამიანი დაშავდა. დაღუპულთა ვინაობა ჯერ კიდევ უცნობია.
ისრაელის სამხედროების განცხადებით, რომელიც, როგორც ჩანს, იმავე ინციდენტზე მიუთითებს, ისინი თავს დაესხნენ ცენტრს, რომელსაც ჰამასი და მისი მოკავშირე ისლამური ჯიჰადი იყენებდნენ ისრაელის ძალების წინააღმდეგ თავდასხმების დაგეგმვისა და განხორციელებისთვის.
ჰამასის კონტროლირებადი ღაზის ჯანდაცვის სამინისტრო აცხადებს, რომ ხუთშაბათს ისრაელის სხვადასხვა საჰაერო თავდასხმის შედეგად კიდევ 16 ადამიანი დაიღუპა, რითაც ხუთშაბათს დაღუპულთა რიცხვმა 26-ს მიაღწია.
18 მარტს იანვრის ცეცხლის შეწყვეტის შეთანხმების ჩაშლის შემდეგ, ისრაელის თავდასხმების შედეგად დაიღუპა 1900-ზე მეტი პალესტინელი, მათ შორის ბევრი მშვიდობიანი მოქალაქე.
საჰაერო და სახმელეთო ოპერაცია ისრაელმა დაიწყო 2023 წლის 7 ოქტომბერს სამხრეთ ისრაელზე ჰამასის თავდასხმის შემდეგ, როცა 1200-ზე მეტი ადამიანი დაიღუპა, 250-ზე მეტი ტყვედ ჩავარდა და ისინი ღაზაში წაიყვანეს.
ჰამასის მიერ კონტროლირებადი ღაზის ჯანდაცვის სამინისტროს მონაცემებით, ისრაელის სამხედრო ოპერაციის შედეგად დაღუპულია 51 ათასზე მეტი პალესტინელი.