ინდოეთში მომხდარ ჭყლეტასთან დაკავშირებით 4 ადამიანი დააკავეს

ინდოეთის პოლიციამ ოთხი ადამიანი დააკავა ქალაქ ბენგალურუში მომხდარ ჭყლეტასთან დაკავშირებით.

ოთხშაბათს 11 ადამიანი დაიღუპა კრიკეტის სტადიონთან ათიათასობით ადამიანის შეკრების დროს. ისინი თავიანთი გუნდის, Royal Challengers Bengaluru's-ის (RCB) ისტორიულ გამარჯვებას აღნიშნავდნენ ინდოეთის კრიკეტის პრემიერ ლიგაში.

დაკავებულთა შორის არიან RCB-ს თანამშრომლები და ზეიმის ორგანიზატორები.

პოლიციის ხუთი მაღალი რანგის თანამშრომელი, მათ შორის ქალაქის პოლიციის უფროსი, სამსახურიდან გაათავისუფლეს „დაუდევრობისა და უპასუხისმგებლობის“ გამო.

პოლიციის წარმომადგენელმა BBC-ს განუცხადა, რომ გამოძიების შედეგად კიდევ რამდენიმე პირის დაპატიმრებაა მოსალოდნელი.

გამარჯვების აღსანიშნავად სტადიონთან 200 000-ზე მეტი ადამიანი მივიდა, თუმცა პოლიცია ამ რაოდენობის მხოლოდ ნახევარს ელოდა. სტადიონი, სადაც ღონისძიება უნდა ჩატარებულიყო, 32 000 მაყურებელს იტევს და ის გუნდის მისვლამდე დიდი ხნით ადრე გადაიტვირთა.