ҮКІМЕТ АПТАЛЫҒЫ: Қазақстан теңгенің еркін айырбас бағамын енгізіп, инфляциялық таргеттеуге көшті
АСТАНА. ҚазАқпарат - Күні кеше Миинстрлер кабинеті мүшелерін Үкімет үйіне жинаған ҚР Премьер-Министр Кәрім Мәсімов бұл жолғы селекторлық отырысын әдеттегіден тыс форматта, яғни тікелей көрсетілім арқылы жүргізіп, Қазақстан халқына еліміздің Ұлттық банкімен бірлескен арнайы мәлімдемесін жасады. «Қазіргі уақытта Үкімет пен Ұлттық банк әлемдік экономикадағы теріс факторлардың күшеюін ескеріп, экономика мен жұмыспен қамтылудың тұрақты ұзақмерзімді өсімін қамтамасыз ету үшін құрылымдық реформалар топтамасын әзірлеуде», - деді отырысты ашқан Премьер-Министр. К.Мәсімовтің атап өтуінше, Мемлекет басшысының тапсырмасын орындау мақсатында Ұлттық банк ағымдағы жылы орташа мерзімді болашақта инфляциялық таргеттеуге көшу бойынша кешенді шараларды жүзеге асыруға кіріскен. Ағымдағы жылдың 15 шілдесінде Ұлттық банк теңгенің айырбас бағамын барынша оңтайлы әрі, еркін қалыптастырылуын қамтамасыз ету мақсатында валюталық дәлізін кеңейту туралы шешім қабылдаған.