217 «жайлы мектепті» күтіп ұстауға жыл сайын 7 млрд теңге керек — министрлік

Қолданысқа берілген 217 «жайлы мектепті» күтіп ұстауға жыл сайын 7 млрд теңге керек. Бұл туралы Оқу-ағарту вице-министрі Еділ Оспан Сенатта өтіп жатқан дөңгелек үстелде айтты.

— 2026-2028 жылдарға арналған жалпы сипаттағы трансферттерді қалыптастыру Мемлекет басшысының тапсырмасында айтылған 1300 мектепті жаңғырту жобасын іске асыруға және қолданысқа берілген «жайлы мектептерді» күтіп ұстауға қажетті қаражат қарастыру бөлігінде әзірленіп жатыр. Аталған шығыстар бұған дейін жергілікті бюджет базасында ескерілмеген. Яғни, жалпы сипаттағы трансферттерге қосымша қаражат қажет болады. Атап айтқанда, 217 «жайлы мектепті» күтіп ұстауға жыл сайын 7 млрд теңге қажет деген болжам бар. Алдын ала деректер бойынша 2026-2027 жылдары 1300 мектепті жаңғыртуға шамамен 700 млрд теңге керек болады, — деді ол.

Министрлік бұдан бөлек жеке меншік білім беру ұйымдарына мемлекеттік тапсырыс аясында жыл сайын бөлінетін 260 млрд теңгенің шығысын да жергілікті бюджеттердің мойнына ілмекші.

Сондай-ақ, жергілікті бюджеттерге мынандай шығыстарды беруді жоспарлап отыр:

— мектепке дейінгі білім беру ұйымдарындағы педагогтердің еңбекақысын ұлғайтуға жыл сайын шамамен 93 млрд теңге;
— мемлекеттік білім беру ұйымдарындағы медициналық қызметкерлердің еңбекақысын ұлғайтуға жыл сайын шамамен 4 млрд теңге;
— колледж ұйымдарында білім алушылардың мемлекеттік стипендиясын ұлғайтуға жыл сайын шамамен 100 млрд теңге.
— Жалпы ұсынылған бағыттар Ұлттық экономика және Қаржы министрліктерімен бірге пысықталады, — деді Еділ Оспан.

Еске салсақ, 15 наурызда Мемлекет басшысы жаңа Бюджет кодексіне қол қойған еді.

Бұған дейін бюджетке донор болып отырған өңірлерден алатын трансферттер көлемі азаятыны мәлім болды.

Сообщение 217 «жайлы мектепті» күтіп ұстауға жыл сайын 7 млрд теңге керек — министрлік появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.