Жалақы 890 мың теңгеге дейін. Қазақстандағы ең жоғары жалақы төленетін салалар аталды

Ұлттық статистика бюросы Қазақстандағы жалдамалы қызметкерлердің былтырғы IV тоқсандағы жалақысы туралы ақпарат жариялады. Бұл ретте кәсіпкерлік қызметпен айналысатын шағын кәсіпорындар да есепке алынған, - деп хабарлайды Tengrinews.kz тілшісі.
Мәліметтерге сәйкес, 2024 жылдың IV тоқсанында ең жоғары жалақы – 890 573 теңге – сақтандыру және қаржы қызметі саласындағы қызметкерлерде болған.
Тау-кен өнеркәсібі мен карьерлерді игеру саласында жұмыс істейтіндер 856 521 теңге табыс тапқан. Жалпы, былтыр жыл аяғында өнеркәсіп саласындағы орташа жалақы 545 797 теңге болған.
Ақпарат және байланыс саласында жұмыс істейтіндер 809 564 теңге алған. Кәсіби, ғылыми және техникалық қызмет саласында 614 101 теңге жалақы тіркелген. Көлік және қоймалау саласында жұмыс істейтіндердің табысы 532 752 теңге болған.
Ең төменгі жалақы ауыл, орман және балық шаруашылығы саласындағы қызметкерлерде (270 082 теңге); сумен жабдықтау, кәріз жүйесі, қалдықтарды жинау, өңдеу және жою, ластануды жою қызметінде (274 994 теңге), сондай-ақ өнер, ойын-сауық және демалыс саласында (291 282 теңге) тіркелді.
Қазақстанның қалалары мен облыстары арасында шағын кәсіпорындарды есепке ала отырып, ең жоғары орташа айлық жалақы Атырау облысында (593 653 теңге), Ұлытау облысында (582 943 теңге), Маңғыстау облысында (564 014 теңге), Астанада (548 579 теңге) және Алматыда (533 365 теңге) байқалған.

"Бір қызметкердің орташа айлық номиналды жалақысы есепті кезеңдегі еңбекақы қоры сомасын нақты қызметкерлер санына және айлар санына бөлу арқылы анықталады", – деп түсіндірді Ұлттық статистика бюросы.

Сілтемесіз жаңалық оқисыз ба? Онда Telegram желісінде парақшамызға тіркеліңіз!