Қазылған жолдар және оқу жылының басталуы: Алматыда кептеліске қалай дайындалып жатыр?

Алматы полициясы жол жөндеу жұмыстарының жалғасуы мен көлік легінің артуына байланысты оқу жылының басында жол қозғалысын реттеу үшін қандай шаралар қабылданатынын айтты, деп хабарлайды Tengri Auto тілшісі.
Көлік кептелісін болдырмау үшін Алматының ең көп жүктеме түсетін қиылыстарына қосымша патрульдік полиция жасақтары қойылады деп күтіледі.

"Оқу жылы қарсаңында қалада көптеген құрылыс-монтаж жұмысы жүргізіліп жатыр. Жүктеме өте үлкен болады. Қиылыстарда жол қозғалысы қауіпсіздігін қамтамасыз ететін жаяу патрульдер қойылады", - деді Алматы қалалық ПД Қоғамдық қауіпсіздік басқармасының бастығы Тимур Ноғайбаев.

Алматы қалалық ПД Қоғамдық қауіпсіздік басқармасының бастығы Тимур Ноғайбаев. Фото: ӨКҚ
Тимур Ноғайбаев полиция қызметкерлері жолдардағы жағдайды қадағалап, қажет болған жағдайда жедел әрекет ететінін атап өтті. Атап айтқанда, инспекторлар көлік кептелісін болдырмау үшін кептеліс пайда болатын қиылыстарды алдын ала анықтайтын болады.
Қосымша жасақтарды қаланың айналма жолдарына - Қарасай және Іле аудандары жағынан Талғар және Құлжа тасжолдарына бағыттау жоспарланып отыр.
Бұл ретте қаладағы бағдаршамдардың жұмыс режимін өзгерту әзірге жоспарда жоқ.

"Бірақ бейнебақылау арқылы белгілер түсетін болса, кезекші бөлімнің инспекторлары жағдайды бақылап, тиісті қиылыстардағы қозғалысты жеңілдетеді", - деді ол.

Осылайша, оқу жылының алғашқы күндері Алматыдағы жол қозғалысын негізінен патрульдеуді күшейту және жолдардың ең көп жүктеме түсетін учаскелерін жедел бақылау арқылы реттеу жоспарланған.