Қазақстандық әйел күйеуінің меншік құқығына байланысты тұрғын үй кезегінен шығып қала жаздады
Павлодар облысының мамандандырылған ауданаралық әкімшілік соты қазақстандықтың әкімшілік талап арызын қарады. Әйел өзiнiң тұрғын үй құқықтарын қорғауды сұраған, деп хабарлайды Tengri Home соттың баспасөз қызметіне сілтеме жасап.
2016 жылы ол мемлекеттік тұрғын үй қорынан баспанаға мұқтаждар есебіне қойылып, "Жетім балалар және ата-анасының қамқорлығынсыз қалған балалар" санаты бойынша кезекке енгізілген.
Кейін азаматтарды тұрғын үйге мұқтаждар есебіне қою және мемлекеттік қолдау шараларын бөлу функциялары "Отбасы банкке" берілді.
"2026 жылы жүргізілген түгендеу нәтижелері бойынша талап қоюшының жұбайының атында жылжымайтын мүлікке тіркелген меншік құқығының бар екендігі анықталуына байланысты банк К.-ға қатысты мемлекеттік қолдау шараларын көрсетуді тоқтатты", - деп хабарлады сот істің мән-жайын.
Сот банктің мұндай шараны қолдануы заңда көзделмегенін анықтады.
"Сонымен қатар заңнамада жетім балалар мен ата-анасының қамқорлығынсыз қалған балаларды тұрғын үй алғанға дейін, заңның 73-бабы 1-тармағының 1) және 5) тармақшаларында көзделген мән-жайлар туындағанына қарамастан, есептен шығаруға тыйым салынған. Аталған норма императивтік сипатқа ие. Осылайша, К.-ға қатысты мемлекеттік қолдау шараларын негізсіз тоқтату оның тұрғын үй құқықтары мен заңды мүдделерінің бұзылуына әкеп соққан", - деп толықтырды сот.
Банктің әрекеті заңсыз деп танылды. Сот талап қоюшының мемлекеттік тұрғын үй қорынан баспана алу құқығын қалпына келтіріп, оның есепке қойылған бастапқы күнін сақтап қалды. Шешім заңды күшіне енді.
Бұған дейін қазақстандықтың 10 жылдан кейін әжесінің мұрасына құқығын қалай қалпына келтіргені туралы жазған болатынбыз. Үй ағасына өтті деп ойлаған қыз өзінің үй иесі болуына мүмкіндік беретін жағдайлар бар екенін білмеген. Соттың мән-жайын мына жерден оқыңыз.
Тағы оқыңыз: Жұбайының учаскесіне үй салынған. Ажырасу кезінде жылжымайтын мүлікті қалай бөлуге болады?