Қазақстанға қамқоршы болыңыздар - Тоқаев
Мемлекет басшысы Қасым-Жомарт Тоқаев Астанада "Таза Қазақстан" акциясына қатысушылар алдында сөз сөйледі. Шара барысында Президент Әділетті, Қауіпсіз, Озық және Таза Қазақстанды құру - әрқайсымыздың қастерлі парызымыз екенін атап өтті, - деп хабарлайды Tengrinews.kz Ақорданың баспасөз қызметіне сілтеме жасап.
Оның айтуынша, осы жолда бәріміз белсенді жұмыс істеуіміз керек
"Осы жолда бәріміз белсенді жұмыс істеуіміз керек. Қасиетті Отанымызды дамытудың бұдан басқа жолы жоқ. Бәріміз адал, шыншыл және жауапты да болуымыз қажет. Кейбір уақытта байқалмай айтылған сөздердің зияны басқа әрекеттерге қарағанда әлдеқайда қауіпті болады. Соны ешқашан ұмытпаңыздар. Әрқашанда еліміз туралы ойлап, Қазақстанға қамқоршы болыңыздар. Басқа Отанымыз жоқ. Еліміз аман болса, сіздер де, отбасыларыңыз да бақытты болады, төрт құбыламыз түгел болмақ. Қазақстанның күшті, мықты ел болғаны ең алдымен өзімізге қажет", - деді ол.
Мемлекет басшысы волонтерлерге көрсетілетін қолдау туралы да еске салды.
"Cіздер - жас, жігерлі азаматсыздар. Волонтерлік қызметпен айналысып жүрсіздер. Өте дұрыс. Мен еріктілердің еңбегін қолдаймын. Бұл - елге шынайы жанашыр болудың нақты көрінісі. Біз 2020 жылды Волонтер жылы ретінде атап өттік. Сондай-ақ, Біріккен Ұлттар Ұйымында сөйлеген сөзімде мен Халықаралық волонтерлер жылын белгілеу туралы бастама көтердім. Бұл ұсынысымды әлем елдерінің барлығы дерлік қолдап, 2026 жыл Халықаралық волонтерлер жылы болып жарияланды. Бұл жыл сіздерге арналды. Бұдан бөлек, Қазақстан - волонтерлік қызметті ең жоғары заң деңгейінде, яғни Конституцияда бекіткен санаулы мемлекеттердің бірі. Осы орайда, еліміздегі және шетелдегі барша еріктілерді шын жүректен құттықтаймын! Сондай-ақ мен былтыр Біріккен Ұлттар Ұйымының мінберінен елімізде "Таза Қазақстан" бірегей жобасы табысты жүзеге асырылып жатқаны туралы айттым", - деп атап өтті Тоқаев.
Президент бұл бастаманы БҰҰ Бас Ассамблеясының барлық дерлік мүшелері қолдағанын еске салды.
"Мұның бәрі Қазақстанның дүние жүзіндегі озық үрдістерді терең түсініп, заман талабына сай дамып келе жатқанын көрсетеді. Осылайша, еліміз әлемдегі бейбітшілікті сақтауға өзінің елеулі үлесін қосып отыр. Еліміздің болашағы - сіздер сияқты білімді, белсенді, көзі ашық, көкірегі ояу, талапты жастардың қолында! Жолдарыңыз әрдайым ашық болсын! Баршаңызға амандық және сәттілік тілеймін!", - деп толықтырды ол.