Өзбекстанда он чакты имам иштен бошотулду
Өзбекстандын Мусулмандар дин башкармалыгы 26-июлда республиканын бир катар мечиттеринен имамдардын иштен алынышы тууралуу түшүндүрмө берди.
Маалыматка караганда, Сырдарыя облусунда үч имам диний билими жок болгондуктан бошотулду. Мыйзамсыз нике кыюу, мечитке келгендерге орой мамиле кылуу фактылары катталганына байланыштуу Сырдарыя облусунун башкы имам-хатиби Муминжон Усманов да ээлеген кызматынан алынды.
Ташкенттеги «Шайх Зайниддин» мечитинин имам-хатиби Одилхон Исмоилов "мечит тартиптерин сактабай, күн сайын окулчу намаздарга келбей, такталбаган маалыматтарды Интернет аркылуу тараткан" деген жүйө менен иштен кетти.
Фергана районунун имам-хатиби Хасанбой Ашуров менен Самарканд районунун имам-хатиби Абдурахим Пулатов "тапшырмаларды өз убагында аткарган эмес, имамга ылайык келбеген орой мамиле кылган" деген негизде жумушунан кол жууду.