Бычакталган журналист милицияга арыз жазуудан баш тартты
Жалал-Абадда белгисиз бирөө бычактап кеткен журналист Санрабия Сатыбалдиеванын абалы жакшы.
Дарыгерлер жараат алган колун тигип беришкенин өзү “Азаттык” радиосуна билдирди. Журналисттин айтымында, факт боюнча тергөө иштери жүрүп жатат. Ал милицияга арыз жазуудан баш тарткан себебин мындайча түшүндүрдү:
- Окуя болгондон кийин 20дай кызматкерге жооп берип жатып чарчадым. Ар кандай суроолор болду. Ал ортодо "сиз сүрөттөп берген адам табылбай калса, кайра өзүңөргө кылмыш иши ачылат. Жалган көрсөтмө үчүн" дешти. Ошондуктан баш тарттым.
Баштапкы маалыматка караганда, Санрабия Сатыбалдиева 9-ноябрда эртең менен үйүнөн чыгып баратканда белгисиз бирөө ага бычак шилтеген. Жабыркаган журналист азыр ооруканада.
Санрабия Сатыбалдиева - "YouTube" сайтындагы Malina.TV каналынын негиздөөчүсү жана алып баруучусу. Ал эфирден түрдүү социалдык маселелерди көтөрүп чыгып жүрөт. (RsK/КЕ)