Турак жайды камсыздандыруу маселеси каралат
Жогорку Кеңештин “Республика – Ата Журт” фракциясы курулуш, бизнес чөйрөсүндөгү бүгүнкү кырдаал жана шаар куруу, турак жайларды милдеттүү камсыздандыруу боюнча мыйзамдардын аткарылышын талкуулайт.
Бул багытта биринчи вице-премьер-министр Кубатбек Боронов жана Архитектура, курулуш жана турак жай-коммуналдык чарба мамлекеттик агенттиктин директору Бактыбек Абдиев маалымат берет.
2016-жылдын февраль айынан тарта Кыргызстанда турак жайды милдетүү камсыздандыруудан өткөрүү үчүн мыйзам кабыл алынган. Ага ылайык шаарларда камсыздандыруунун баасы 1200, айылда 600 сом деп бекиген.
Мыйзамда турак жай табигый кырсыктан жабыркаса камсыздандыруу компаниясы келтирилген зыяндын ордун толтуруу үчүн 1 миллион сомго чейин акча төлөнүп берилери жазылган.
Былтыр президент республикалык бюджетке түшкөн оорчулукту азайтуу милдетин толук аткарбай жатат деп Камсыздандыруу уюмунун ишин сындаган. (КЕ)