16.05.08
«Аалам», 16.05.08 — 2-бет: Полит-элита…•№48, 16.05.08-ж.
Р.Жээнбеков келсе, аэропорттон эле камалат
Оппозициянын трагедиясы ушул: ким бийликке таарынса, ачуу сөз айт-са эле болду, ойлонбой туруп кошуп алышат (ошол лидердин көчүгү бок экенин уруп да ойношпойт). Мындай жүрүшү менен оппозиция аңга тыгылары ажеп эмес. Маселен, Америкадан айгай салган Р.Жээнбековдун жүзүнө үңүлүп көргүлөчү? А.Акаев доорунда маммүлктү башкарганы, анан жеп-ичкени боюнча кылмыш ишинин козголгону (экс-үйбүлөнүн байлыгын камсыздаганы), кийин К.Бакиев мезгилинде Малайзияга элчи болуп дегеле жарытылуу иш кылбаганы маалым. Ушу күндө Р.Жээнбековдун артында том-том кылмыш иши турат. Өзү оппозицияда. Ушул көрүнүш оппозицияга аброй апкелеби? Кудайды бир карайлычы… Эми оппозициянын айрым лидерлерине Р.Жээнбековдун келиши маанилүү экен. Келсе камалат. Мындан чуу көтөрүп, сенсация издөөнүн өзү акылга сыйбайт дечи. Айрым күч органдарынын билдирүүсүнө таянсак, Р.Жээнбековду аэропорт-тон чыгарбай туруп камашаары дайын болду.
Өмүкө кичи мамлекет куруу жандалбасындабы?
Экс-министр, экс-фронтчу Ө.Субаналиев Нарынга губернатор болгону тынчып эле калган. Көрсө, тынч жатпаптыр. Көнүмүш «борзыйлыгына» салып, облустун кадр саясатын каалагандай калчап аткандай. Мектеп деректирлигин кызматка коюуга да киришип, андан сырткары, Нарын райондук салык башчылыгына да өз кишисин коюуга далалаттанып, бирок мунусу ара жолдо калыптыр. Акүй дзотун жаралбай. Өмүке чычалабасын, кечээ эле фронттун активдүү лидери болуп, К.Бакиев бийлигин кетирүү менен кезексиз шайлоо өткөрүү ураанында жүрбөдү беле? Анан УКК сурагына кабылганы, аяктан зорго кутулганы, натыйжада бийликтин кумарын тез эле сагынып, ажого экинчи жүзү менен честь берип, губернаторлукка секирген. Эми кечээги жүрүштөрүн унутуп, Нарында кичи мамлекет куру вазийпасына өтүүдө. Баракелде-е, Өмүкө, Шералынын чокоюн унутпасаңчы. Оомат деле кетет да…
Аялдын эмес, арактын азабы…
Мамалко агенттигинин деректири А.Батырбековдун калбыры кылая баштады. Бу саам башкасын чукубайлы, бир эле жагдайын сөз кылсак: арак маркасы бир бөтөлкөнүкү 21 сом, винонуку болсо 6 сом. Мындай шартта чо-оң акча табуу жолу оркоюп чыгып атпайбы. Арак заводдору жасалма жолдо маркасын чапташып, салыктан буйтап атышканын каңкуулашууда. Эсептеп көрүңүз, бир эле бөтөлкөдөн 21 сом кармашса, миллиондогон арак сатуудагы мүшөк-мүшөк акча кимдин «кампасына» кетет? Эгер бул ишти тергеп чыгышса, бюджетке пайда келет беле? Ай ким билет(?), арак менен аялдын азабы курутмай болду го…
Оппозиция апакайбы?
Соңку күндөрү оппозиция жээги алда немеден үрккөндөй чочулап, «куугунтукка түшкөнү калдык» деп жер сабоодо. Биз изилдеп көрдүк. Оппозициянын алдыңкы лидерлерине кылмыш иши козголууга негиз деле жок экен. Бийликтин кайырмагына илинбей, таза чыккан Ө.Текебаев, А.Жекшенкулов, А.Атамбаев, Т.Сариев сыяктуулар апакай экен. Коркпой-үркпөй «салгылашын» уланта беришсе болот.
А.Жапаровдун «лапшасынан»
Экономика министри А.Жапаров аргасыз баш чайкатат. Өткөндө парламенттен «азык-түлүк 10%га кымбаттады» деп жар салды. «Калптын казаны кайнабайт». Үйрөнбөй койдук го. Эми азык-түлүктүн 2-3 эсеге кымбаттаганын экономика министри билбесе, шорубуздун кайнаганы экен. Башкасын айтпайлык, кечээги 5-7 сомдук нан 10 сомдон ашканы жалганбы? Күйүүчү май 30 сомдон өйдө чапчыды. Дагы асмандайт. Отура берелик. Анан А.Жапаров сыяктуу аткаминерлер ажону уят кылбаганда, кимди ким уятка батырат?..
М.Султанов шылкыйып суракта
ЖКдагы чуусу бүтпөгөн 12 «Саmry» автоунаасына чекит коюла элек. Тергөө жүрүүдө. Машинени апкелүү боюнча түзүлгөн комиссиядагы депутаттар каралууда. Экс-депутаттардын көч башын улап соцфонд төрагасы М.Султанов башын шылкыйтып тергөөгө келип, көңүлү жок чыгууда. А машинелер дале жолдо келаткан имиш…
Т.Акматов коңгуроо кагып жүрү
Мурда салык комитетин Т.Акматов деген жетектеп кеткен. Акыркы кездери бу киши ай-асманга түйүлүп, ажого кирмекчимин деп күндө жазылат же бир киралсачы? Т.Акматов Акүй администрациясына коңгуроо каккандан тажабады, тигилер жол буугандан эригишпеди.
21-майда Коомдук парламенттин жыйыны
Коомдук парламент депутаттары 21-майда кезектеги жыйынга отурушмай болушту. Жыйында бүгүнкү күндүн «азап-тозогу»: Кыргызстандын жаңы концепциясы, Түптөгү жөө жүрүштүн жыйынтыгы, Түштүк аймактагы көйгөйлөр, ММКлардын абалы, азык-түлүк коопсуздугу сыяктуу маселелер талкууланат да, андан ары Коомдук парламент жайкы эс алуу камын көрмөкчү…
Баскынчы милиция жазаланууда
Бир ай мурда Жалалабат милиция кызматкери бейкүнөө атуулдун чөнтөгүнө героин салып, кишендеп аткан жеринен облпрокуратура басып жыгылып, милиционерди камашкан. Мындай кабарды уккан 40-50 милиция кызматкери облпрокуратураны барымтага алып, кесиптешин куткарып кетишкен. «Жунгли закону» деп ушуну айт. Бул боюнча Башкы прокуратура катуу чараларды көрүү менен тергөө ишин аяктап калды. Баскынчы милиционерлер камалууда. Эң кызыгы — бул чуулгандын коомчулукка жетпегени таңкалтырат. Кийинки сандарда «баскынчы милиционерлерди» жазмакчыбыз… Баса, мындан ары ИИМ анабашы М.Конгантиев темирдей тартипти орното алабы?
«Аалам-пресс»
0516.htm