Жазуучу Темирбек Жолдубаевдин «Бүркүт» аңгемеси эл аралык дипломго татыды
Кыргызстандын Улуттук жазуучулар союзунун мүчөсү, жазуучу Темирбек Жолдубаевдин «Бүркүт» аңгемеси «Евразия чыгармачыл гилдиясы» уюмуна караштуу сынакта байгелүү орунга татыды. Аңгеме эл аралык адабий порталдын «Чыгыш-Батыш» басылмасынын 3-чыгарылышынын эң мыкты чыгармасы аталды. Аны орус тилине котормочу Гүлнар Эмилова которгон.
Эмилова 30-сентябрда «Азаттык» радиосуна билдиргендей, карантин убагында Санкт-Петербургдагы жазуучу Гумер Каримов менен онлайн сүйлөшүүлөрдүн натыйжасында адабий журнал ачылган. Ал журналга 63 мамлекеттеги акын-жазуучулардын чыгармалары жарыяланып турат.
«Ошол журналга жарыяланган чыгармалардын ичинен редколлегиянын пикири боюнча эң мыкты деп ушул аңгеме табылды», - деди ал.
«Евразия чыгармачыл гилдиясы» дүйнө жүзүндөгү маданий ишмерлердин башын бириктирип, жазуучу, акын, музыкант, бийчи, иллюстратор, графикалык дизайнер, скульптор өңдүү өнөр адамдарынын эмгектерин жайылтуу максатында түзүлгөн. (MSd)