Балканската четворка заседава во Солун
![Балканската четворка заседава во Солун](https://gdb.rferl.org/6F6D4BB7-5BD1-46D3-841E-F93BF11611D7_w800_h450.jpg)
Во Солун доцна попладнево почна заседание на Советот за соработка на високо ниво меѓу премиерите на Бугарија, Грција и Романија, Бојко Борисов, Алексис Ципрас и Виорика Данчила и претседателот на Србија Александар Вучиќ.
Во фокусот на разговорите на лидерите на балканската „четворка“ е забрзувањето на имплементацијата на заедничките транспортни и инфраструктурни проекти, а ќе стане збор и за продлабочување на регионалната стабилност.
Тоа е четврта средба по ред во тој формат. Првиот Совет за соработка меѓу лидерите на четирите држави се одржа во Варна, а негов домаќин беше бугарскиот премиер Бојко Борисов. Следеа состаноци во Белград и Букурешт, а домаќин на денешната средба во Солун е грчкиот премиер Алексис Ципрас. Министрите за транспорт на четирите земји одржуваат паралелен состанок во Солун за да разговараат за продлабочување на соработката за патните и железничките врски.