Отворен групниот дом во Тимјаник

Во неготинското село Тимјаник денеска беше отворен групниот дом во кој ќе бидат сместени Мартина, Аделина, Никола и Антонио, четири деца со попреченост кои претходно живееја во Заводот во Демир Капија.


Како што рече министерката за труд и социјална политика Мила Царовска, тие сега добија подостоинствен живот. Таа им се заблагодари на УНИЦЕФ, УНДП, Сојузот на дефектолози, општините кои го прифаќаат овој концепт и градоначалникот на Неготино.


Претходно други три дечиња беа сместени во мал групен дом во Неготино, а министерката најави дека процесот продолжува и понатаму во сите институции.


Кога беше донесена одлуката за мал групен дом во Тимјаник, жителите на селото протестираа против неговото отворање со образложение дека тоа ќе влијае на нивните деца. По неколку средби со министерката Царовска, тие дозволија отворање на оваа институција.