Чизов - Протерувањето руски дипломати од Грција е под влијание однадвор

Постојаниот претставник на Русија во Европската унија, Владимир Чижов изјави дека одлуката на Грција да протера руски дипломати е предизвикана под влијание однадвор.

„Не е можно да се објасни тоа на логичен и разумен начин. Тоа е повеќе од очигледна провокација. Толку е очигледна да не можам да верувам дека зад неа се само Грци, а добро ја познавам таа држава“, изјави Чижов за Канал Росија 24.

Тој е уверен дека „надворешното влијание постои и зад правно сомнителниот договор за името на Македонија“.

Весникот „Катимерини“ на 11 јули објави дека Атина одлучила да протера двајца руски дипломати и на уште двајца да им забрани влез во државата поради мешање во внатрешните работи на државата и поткопување на националната безбедност на Грција.