Македонија, Србија, БиХ и Црна Гора бараат целосно повлекување на косовските трговски бариери

Министрите за земјоделство, трговија и економија на Македонија, Србија и БиХ, како и претставникот од Црна Гора денеска на состанокот во Белград ја поздравија одлуката на Приштина за делумно повлекување на трговските бариери, со барање, веднаш, без одложување, да ги повлече царините и за останатите производи.


Еден од заклучоците на состанокот е и секоја земја да може да воведе соодветни контра-мерки, ако Косово во најскоро време не ги укине и останатите трговски бариери.


Министрите донесоа одлука за формирање оперативно тело со цел спречување и решавање на идните трговски бариери во регионот. Воедно испратија порака дека се против почнување царинска војна во регионот, зашто сите земји, рекоа, со тоа губат.


„Македонија и натаму е најпогодена со овие бариери. Очекуваме итно повлекување на оваа одлука. Во спротивно Македонија ќе ги преземе сите чекори и мерки кои се во функција на заштита на македонското земјоделство, домашното производство и граѓаните“, изјави министерот за земјоделство Љупчо Николовски по состанокот во Белград.