Попис во Албанија во 2020, за првпат графа националност и верска припадност

Албанскиот Институт за статистика во 2020 година ќе спроведе попис на населението, домаќинствата и земјоделските стопанства, девет години по последниот попис. За првпат во пописниот формулар ќе постои графа на која граѓаните ќе може да ја искажат по своја волја, етничката и верска припадност.

Директорката на Институтот, Делина Ибрахимај, вели дека формуларот ќе биде поделен на два столба и тоа со задолжителни и незадолжителни прашања.

Прашањата за верската и за етничката припадност, не се задолжителни.

Со цел да се надминат проблемите со личните податоци, Институтот во подготовката на формуларот соработувал со Комесарот за заштита од дискриминација и ги почитувал стандардите на европските земји, Обединетите нации и Канцеларијата за статистика при ЕУ, Евростат.

Според пописот спроведен во октомври 2011година Албанија има 2.891.977 жители. Од вкупната попишана популација, со постојано место на живеење во Албанија се 1.421.810 жители, додека другите се со престој во странство до една година. Споредено со податоците од пописот во 2001 година бројот на вкупната популација е помал за 7,7 отсто, како резултат на емиграцијата и намалениот наталитет.

Пописот го бојкотираа припадниците на малцинствата, но попишувачите ги попишуваа врз основа на податоците од матичните служби на населеното место.