Комисијата гласаше за одземање на мандатот на Груевски, конечната одлука на Собранието
![Комисијата гласаше за одземање на мандатот на Груевски, конечната одлука на Собранието](https://gdb.rferl.org/3259A7ED-051C-4629-8900-4BE1ECA08F89_w800_h450.jpg)
Со пет гласа „за“, деветчлената собраниска Комисија за мандатно-имунитетни прашања одлучи да му предложи Собранието да му го одземе мандатот на пратеникот Никола Груевски, зашто смета дека е недостоен за пратеничката функција, откако беше осуден на две години затвор во случајот „Тенк“ на СЈО.
Пратеникот Трајко Вељаноски од ВМРО-ДПМНЕ, на почетокот на седницата рече дека се работи за политички процес и оти нема да гласаат, по што членовите од ВМРО-ДПМНЕ ја напуштија расправата.
Пратеникот Сашо Василевски, кој не е член на комисијата, се обрати во име на независната пратеничка група на пратениците кои беа исклучени од ВМРО-ДПМНЕ по гласањето за почеток на уставни измени. Тој рече дека расправата е избрзана, зашто вчера се формираше Комисија за помирување, и оти нивната пратеничка група ќе гласа против одземање на мандатот на Груевски, со што е неизвесно дали ќе се обезбеди потребното двотретинско мнозинство за одземање на мандатот.