Романскиот претседател одби да назначи двајца од осумтемина предложени министри

Романскиот претседател Клаус Јоханис одби да ја назначи Олгуца Василеску за министер за сообраќај и Илан Лауфер за министер за регионален развој.

На денешната прес-конференција Јоханис истакна дека на земјата ѝ се неопходни министри кои добро ќе ја вршат својата работа и побара Владата да даде нови предлози за челни луѓе на тие две Министерства.

Раководството на владејачката Социјалдемократска партија вчера донесе одлука за смени во Кабинетот, согласно кои Василеску од министер за труд беше предложена за министер за сообраќај, а Лауфер требаше да ја преземе функцијата од Паул Станеску. Романскиот претседател оцени дека владините предлози се слабо решение.

„И натаму сметам дека правилна одлука би било смена на Владата, која ѝ создаде многу проблеми на Романија“, оцени Јоханис. Инаку, тој ги потпиша указите за назначување на останатите шестмина нови министри, кои попладне ќе положат свечена заклетва.