Почна судењето за убиството на Џамал Кашоги во Ријад

Почна судењето на 11 лица во Ријад обвинети за убиството на познатиот саудиски новинар Џамал Кашоги, јавуваат тамошните медиуми. Обвинителството бара смртна казна за петмина од обвинетите, чиј идентитет досега не беше соопштен.

Кашоги, кој беше жесток критичар на саудиската влада, беше убиен по влегувањето во саудискиот конзулат во Истанбул на 2 октомври. Неговите останки сè уште не се пронајдени.

Ријад ги негира обвинувањата дека престолонаследникот, Принцот Мухамед Бин Салман е поврзан со убиството кое предизвика светска осуда.

Обвинителството соопшти дека Кашоги бил убиен во „неодобрена“ операција од страна на агенти испратени да го убедат новинарот да се врати во Саудиска Арабија.

Ријад го одби барањето на Турција за екстрадиција на 18 осомничени за убиството, меѓу кои и 15 наводни саудиски агенти кои Анкара ги обвинува дека дошле во Истанбул да го извршат убиството.