Груби: Никој не треба да го оспори евро-атланскиот процес
НАТО и ЕУ се апсолутен приоритет на ДУИ, Албанците и сите други граѓани во Македонија, затоа никој не треба да го оспори овој процес, рече пратеникот и секретар на Демократската Унија за Интеграција Артан Груби на денешната средба со шефот на Канцеларијата на НАТО во Македонија Зоран Јанковиќ.
“Евентуалното оспорување или загрозување на овој процес од опозициските партии ВМРО-ДПМНЕ, БЕСА и Алијансата на Албанците во ниту еден случај не треба да го ставаат под прашање успешниот завршеток на еден волку голем и важен процес, не само за Македонија, туку и за Југоисточна Европа, затоа што за овој процес одговорност носиме сите”, рече Груби.
Како што соопштуваат од прес-службата на партијата, двајцата соговорници на средбата разговарале и за актуелната ситуација во Македонија, со посебен акцент на зачленувањето на земјата во НАТО.