Орбан – Целта на Унгарија е антиимигрантските сили да надвладеат во сите институции во ЕУ

Целта на Унгарија на претстојните избори за Европскиот парламент е „антиимигрантските сили“ да станат мнозинство во сите институции на Европската унија, вклучувајќи ги Европскиот парламент и Европската комисија, изјави денеска унгарскиот премиер Виктор Орбан.

Тој предвидува дека во Европа ќе има две цивилизации – една која ја гради својата иднина мешана исламско-христијанска коегзистенција и друга во Централна Европа, која ќе биде само христијанска.

Орбан на изборите во април го освои третиот мандат водејќи кампања заснована на антимигрантските политики.

„Во наредните 15-20 години, миграцијата ќе биде најважното судбинско прашање на континентот и во рамките на тоа и во Унгарија“, рече Орбан, одговарајќи на новинарско прашање.

Тој рече дека има „голема надеж“ во соработката со Италија и Полска, чии влади се противат на имиграцијата и додаде дека и понатаму го смета десничарскиот италијански вицепремиер Матео Салвини за „свој херој“. Салвини вчера беше во Варшава, во обид да направи сојуз со владејачките полски популисти, во пресрет на изборите за Европскиот парламент во мај, и изрази надеж дека „италијанско-полската оска“ ќе ја замени актуелната „француско-германска оска“.

Салвини рече дека со лидерот на полските конзервативци Јарослав Качински се согласува по најголемиот број прашање, но одредени полски претставници денеска изразија резерви кон Салвини, на кого гледаат како човек премногу пријателски настроен кон Русија. Тие наведуваат дека со Салвини не е постигнат договор, и оти е само договорено да продолжат состаноците и консултациите.