Помпео - Повлекувањето од Сирија ќе се случи

Американскиот државен секретар Мајк Помпео денеска изјави дека повлекувањето на американските војници од Сирија, најавено од претседателот Доналд Трамп минатиот месец, ќе се случи и покрај критиките.


„Одлуката на претседателот Трамп за повлекување на нашите војници е донесена. Ќе го сториме тоа“, рече Помпео на заедничката прес-конференција со неговиот египетски колега, Самех Шукри, во Каиро.


Посетата на Египет е дел од турнејата на Помпео низ девет земји на Блискиот Исток со цел да ги увери арапските партнери дека САД не го напуштаат регионот.


Тој сепак рече дека Вашингтон ќе ја доврши борбата против Исламската држава, додавајќи дека САД остануваат непоколеблив партнер на Блискиот Исток.


Помпео дојде во Египет по посетите на Јордан и на Ирак, каде што се обидуваше да убеди лидерите дека повлекувањето од Сирија не значи дека САД ја напуштаат борбата против Исламската држава или олабавување на притисокот кон Иран.


Тој денеска се сретна и со египетскиот претседател Абдел-Фатах ал-Сиси. Исто така, се предидува да одржи говор за пошироките цели на Вашингтон на Блискиот Исток.


По Египет, Помпео ќе ги посети државите од Персискиот Залив.