УНИЦЕФ: Околу 61 отсто од децата во Северна Македонија не посетуваат предучилишно образование

Новиот глобален извештај на УНИЦЕФ нагласува дека 176 милиони деца на предучилишна возраст не посетуваат предучилишно образование и повикува владите од целиот свет да ги зголемат инвестициите за да обезбедат најдобар почеток во животот за секое дете. Во Северна Македонија, велат од УНИЦЕФ, каде скоро 41,000 деца – околу 61 отсто од децата на предучилишна возраст (од 3 до 6 години) не посетуваат предучилишно образование, Владата се посвети на реформи за подобрување на пристапот и квалитетот на предучилишното образование.


Претставникот на УНИЦЕФ Бенџамин Перкс вели дека во последните неколку години Северна Македонија постигна напредок во обезбедување подобар пристап на децата до предучилишно образование, но сепак опфатот е и понатаму низок и бара континуирано инвестирање за секое дете да добие најдобар можен поттик за да успее во животот и во глобализираната економија.


Извештајот открива дека децата кои посетувале барем една година предучилишно образование имаат поголеми шанси да ги развијат способностите за критичко мислење кои им се потребни за да успеат на училиште, помала веројатност да повторуваат одделенија или да го напуштат образованието, а со тоа кога ќе пораснат имаат поголема способност да придонесат кон просперитетни општества и економии.