Хан: Можна дестабилизација на Балканот ако не почнат преговорите со ЕУ

Одложувањето на отворањето пристапни преговори на Европската унија со земјите од Западен Балкан кои оствариле напредок во исполнување на поставените критериуми, како што е Северна Македонија, може да го дестабилизира целиот регион, изјави еврокомесарот за проширување Јоханес Хан.


Тој во интервју за германската новинска агенција ДПА вели дека одложувањето или „непризнавањето на објективниот напредок на земјите кандидатки би имало драматични последици“ за државите за кои станува збор и за целиот регион воопшто.


„Тоа речиси ќе предизвика домино ефект“, истакна Хан.


Хан очекува на крајот на мај Европската комисија да даде позитивна препорака за Северна Македонија и Албанија за отворање на преговорите за членство во ЕУ врз основа на критериумите кои едногласно ги усвоиле земјите членки.


„Посебно ризично би било доколку на Северна Македонија и се одбие или одложи отворањето на преговорите за членство“, рече Хан додавајќи дека ако земјата биде разочарана по триесетгодишниот спор за името и покрај спроведените реформи, тогаш постои опасност за внатрешна дестабилизација со соодветни последици за целиот регион.


Хан зборуваше пред состанокот кој в понеделник треба да се оджи во Берлин во организација на германската канцеларка Ангела Меркел и францускиот претседател Емануел Макрон со претставници на земјите од Западен Балкан, а главна цел на состанокор, истакна еврокомесарот, е изнаоѓање решение за блокадата на дијалогот меѓу Србија и Косово.