Се распадна владината коалиција во Романија

Коалицијата во романската Влада се распадна откако Алијансата на либералите и демократите (АЛДЕ) излезе од партнерството со социјалдемократите на премиерката Виорика Данчила, објавија агенциите.

Повлекувањето на Алијансата на либералите и демократите од коалицијата ги остава владејачките социјалдемократи со малцинство во Парламентот. Владата се очекува да се соочи со гласање за недоверба во наредните недели.

Данчила рече дека не се плаши од можни предвремени избори, туку од „губење на довербата од народот“. Заминувањето на АЛДЕ од коалицијата дојде откако нејзиниот лидер, поранешниот премиер Калин Попеску Таричану, кој исто така поднесе оставка како претседател на Сенатот, не остана единствениот кандидат од владината коалиција на претседателските избори во ноември. Наместо тоа, Данчила ќе се кандидира против сегашниот претседател Клаус Јоханис, кој се бори за втор мандат.