Милошоски ја достави до обвинителството и втората „бомба“ за Заев
Милошоски викендов од партиското седиште ја објави аудио снимката во која, како што рече се слушало како Заев носел одлуки во име на Врховниот суд и на СЈО и оти бил во дослух со поранешната специјална обвинителка Катица Јанева за сите нејзини одлуки.
Бомбите на Милошоски индиции или средство за политички поени?
Таа снимка и транскриптите од неа Милошоски денеска и ги предаде на обвинителката Вилма Рускоска. Пратеникот нагласи дека бил направен записник и повтори дека материјалите ги добил од анонимен укажувач и оти смета дека се релевантни. Смета и дека обвинителството треба да го повика Заев да даде исказ.
„Она што е интересно да се напомене е дека има разлика во изјавата што ја даде поранешниот премиер Заев, дека се сомнева оти го снимале некои пратеници со кои соработувал и самиот транскрипт каде укажувачот напоменува дека разговорот е воден во присуство на две други лица покрај поранешниот премиер Заев, едното опфатено со „Рекет“, а другото Н.Н. лице“, истакна Милошоски.
Втората варијанта, ако обвинителството не го викне Заев на разговор, според Милошоски е да се земат снимки од камерите во Владата и да се утврди кој во текот на мај 2019 година бил на разговор на оваа тема за да може да се потврди вистината на овие наводи кои беа доставени.
Претседателот на СДСМ по објавената снимка рече дека таа најверојатно била направена на некој од состаноците во рамки на преговорите кои се водеа со претставници на партиите од власта и опозицијата од албанскиот блок и со осумтемина независни од ВМРО-ДПМНЕ. Според него неовластено снимениот разговор покажува зошто морало да се донесе Законот за јавно обвинителство и покажува како со него се надминува одлуката на Врховен суд.
Заев: Снимките на Милошоски покажуваат зошто беше важно носењето на Законот за ЈО
Милошоски минатата недела ја достави до обвинителството и првата аудио снимка на која се слуша гласот на Заев кој како што вели пратеникот разговарал за финансирањето на телевизијата на обвинетиот во случајот „Рекет“ Бојан Јовановски.
Милошоски ја достави до Русковска „бомбата“ која ја пушти во Собрание