СЗО - Над 86 илјади луѓе заразени од коронавирус

Светската здравствена организација (СЗО) денеска соопшти дека од КОВИД-19 на глобално ниво се заразени над 86 илјади луѓе, а најмалку 2.900 луѓе починале од новиот коронавирус. Заразени од вирусот има во 63 земји.

Властите во Иран, која е една од најтешко погодените земји, соопштија дека има пораст на заразени и за три дена има 385 нови случаи, со што сега во земјата има 978 заразени, а досега 11 луѓе починале.

Министерот за здравство на Велика Британија, Мет Хенкок ја опиша епидемијата како „многу, многу значаен предизвик“ и рече дека претпоставката е дека работите ќе се влошат пред да се подобрат.

Велика Британија во моментов има 23 потврдени случаи на коронавирус. За утре во Велика Британија е свикан состанок на Комитетот за одговор при итни случаи, со кој ќе претседава премиерот Борис Џонсон.

Коронавирус - не паничите, следете ги релевантните препораки

Италијанскиот министер за економија Роберто Гуаталари денеска најави дека владата ќе воведе нови мерки во вредност од 3, 5 милијарди американски долари, што претставува околу 0,2 проценти од БДП-то, за да помогне во борбата со ефектите од коронавирусот. Во Италија има повеќе од 1.100 потврдени случаи на КОВИД-19, а 29 пациенти починаа.

Вирусот започна во Кина, каде најмалку 2.761 луѓе починаа, а 79.826 други се заразени. Најпогодени земји освен Кина се и Иран, Италија, Јапонија и Јужна Кореја.