Фронтекс испраќа засилување, кренато нивото на тревога на грчко-турската граница

Европската агенција за гранична и крајбрежна стража (Фронтекс) денеска соопшти дека распоредила засилување и оти е кренато нивото на тревога на грчко-турската граница, додека илјадници мигранти се собираат на границата на Грција.

„Од Грција добивме барање за дополнителна помош. Презедовме чекори за распоредување дополнителна техничка опрема и агенти во Грција“, се вели во соопштението на портпаролот на Фронтекс во Брисел.

Фронтекс, како што се посочува, го подигнал степенот на предупредување за сите граници кон Турција.​

Грција и Бугарија со засилени контроли на границите кон Турција

Соочен со пристигнувањето на илјадници мигранти во границите на Грција, премиерот Киријакос Микотакис за денеска во 18 часот свика состанок на Советот за надворешни работи и одбрана на грчката Влада.

Приливот на мигранти уследи по најавата на турскиот претседател Реџеп Таип Ердоган дека ќе ја отвори границата и ќе им дозволи на мигрантите да влезат во Европа.

За состојбата со мигрантите Мицотакис денеска, телефонски, го известил претседателот на државата Прокопис Павлопулос, соопштија од кабинетот на Мицотакис,

Грчкиот министер за одбрана Никос Панајотопулос рече дека границите се одлично заштитени и чувани. Тој денеска беше во посета на граничниот премин со Турција за да ја види моменталната слика.