СДСМ и БЕСА ги утврдуваат заедничките кандидатски листи

Покрај изборот на кандидати кои би се нашле на изборните листи на претстојните предвремени парламентарни избори закажани за 12 април, во СДСМ паралелно се одвиваат и разговорите со БЕСА во делот на утврдување на заедничките кандидатски листи. Ова денеска го изјави генералниот секретар на СДСМ Љупчо Николовски и додаде дека разговорите на сите нивоа ќе се одвиваат се до Конгресот на СДСМ, до 9 март.


„Разговараме за интегрирање на програмските потенцијали, односно програмските понуди, кои исто така треба да бидат верифицирани и на Конгресот на СДСМ и во телата на БЕСА. Овие процеси се одвиваат согласно динамиката, согласно роковите и договорот што е постигнат меѓу претседателите е цврста гаранцијата дека на следните избори со сигурност ќе имаме заеднички листи првпат и оти многу лесно ќе бидат утврдени местата и позициите“, рече Николовски.



Заев: победник во шестата изборна единица ќе биде коалицијата СДСМ-Беса​


Николовски најави дека до понеделник ќе бидат заокружени сите шест кандидатски листи, на кои како што додаде СДСМ ќе има и кандидати Албанци, но и претставници на сите етнички заедници во земјава.


Генсекот на СДСМ информира дека во моментов во СДСМ завршува внатрепартиската постапка и процедура и во делот на предлагање од ниво на месни одбори до утврдувањето на потенцијалните кандидати од страна на општинските организации. Досега се евалуирани над 750 кандидати кои имаат поднесено кандидатури во СДСМ.