Столтенберг и Хоти разговараа за регионалната безбедност

Генералниот секретар на НАТО Јенс Столтенберг на денешната средба со косовскиот премиер Авдулах Хоти во седиштето на алијансата во Брисел ја поздравил последната рунда преговори меѓу Белград и Приштина кои се водат под покровителство на ЕУ. Како што соопшти НАТО Столтенберг нагласил дека дијалогот е единствениот начин да се постигне трајно политичко решение на Западен Балкан.

Дали преку економски може да се дојде и до политички договор меѓу Србија и Косово?

Двајцата разговарале и за договорот постигнат во Вашингтон минатата недела за нормализирање на економските односи меѓу Белград и Приштина.

„Столтенберг истакна дека НАТО е цврсто посветен на стабилноста на Западен Балкан, што се покажува и со распоредувањето на преку 3.500-члените мировни сили на КФОР во Косово. Тој додаде дека мандатот на КФОР останува непроменет: да ја одржува безбедноста и слободата на движење за сите луѓе во Косово во согласност со резолуцијата на Советот за безбедност на Обединетите нации 1244“, се наведува во соопштението на НАТО.

Инаку, од 12 јуни 1999 година, меѓународната мировна мисија на НАТО, КФОР, престојува во Косово за да обезбеди безбедност во сите делови на земјата.