Македонската економија ковид-кризата ја минува согласно очекувањата на Народна банка

Македонската економија ковид-кризата ја минува согласно очекувањата на Народна банка, оценува вицегувернерката Ана Митреска во интервју за МИА. Таа вели дека банкарскиот сектор е стабилен и доволно силен да апсорбира евентуални загуби предизвикани од ковид-кризата.

„Тековите во македонската економија, во голема мерка ги потврдуваат нашите априлски оцени и очекувања за сегментите кои би биле најчувствителни на оваа криза. Видливи се ефектите врз довербата и перцепциите и на потрошувачите и на инвеститорите, но по првичниот шок се забележува умерено стабилизирање“, вели вицегувернерката.

Таа во интервјуто вели дека извозната активност, со оглед на вклученоста во глобалниот автомобилски синџир забележа остар пад, но како што и очекувале веќе од јуни се гледа поактивно искористување на производствените капацитети. Дознаките од иселениците и работниците во странство, коишто се значаен прилив во економијата беа идентификувани како битен канал на пренос на шокот, вели Митреска.

„Веќе ги имаме податоците за првата половина од годината и тие ги потврдуваат овие оцени, со оглед на намалувањето на приливите. Но, се забележува одредено пренасочување на дел од дознаките во готовина кон формалните банкарски канали, што делумно го ублажува неповолниот ефект. Формалните дознаки во вториот квартал растат со годишна стапка од дури 65 отсто“, вели Митреска во интервјуто.

За директните странски инвестиции во вториот квартал наведува дека има одредено намалување, но дека сепак вкупниот износ на странските инвестиции во првите шест месеци од годината од околу 112 милиони евра е повисок во однос на минатата година и е во рамки на нивните проекции.