Собранието денеска нема да гласа за вонредните состојби
Собранието денеска попладне се очекува да ја продолжи седницата на која ќе се расправа за предлог-одлуката за потпретседателите на Парламентот. На денешната седницата се и петте одлуки за вонредна состојба на претседателот Стево Пендаровски што во законодавниот дом треба да бидат потврдени со двотретинско мнозинство.
Претседателот на Собранието, Талат Џафери рече дека денеска за нив нема да се гласа. Седницата најверојатно ќе биде прекината по точката за Информацијата за состојбите со лозаропреработувачкиот сектор во 2020 на ВМРО – ДПМНЕ, за да се овозможи да се одржи јавна расправа.
Пратеничката група на ВМРО-ДПМНЕ соопшти дека одлучиле да не ги гласаат одлуките на претседателот Стево Пендаровски, за воведување на вонредна состојба. Пратеникот Антонијо Милошоски од ВМРО-ДПМНЕ рече дека владата ги злоупотребила одлуките и тие ја промашиле целта.
Собранието почнува тргни-застани
Предлог-одлуката за петмина потпретседатели ја поднесе претседателот на Собранието Талат Џафери, кој на денешната средба со новинарите кажа дека на координативната средба пратеничките групи се согласиле да продолжи оваа седница. До завршување на расправата, како што појасни Џафери, пратениците може да поднесат амандаман за промена на оваа одлука, а тој како предлагач да се изјасни за неа.
Според Деловникот, опозицијата има едно потпретседателско место, две предлага Комисијата за избори, а другите две се на мнозинството.