Нов обид на САД за мировни разговори во Авганистан

Шефот на здружениот Генералштабот на САД, армискиот генерал Марк Мили неделава имал средба со талибанските власти во Катар, пред да се упати кон Авганистан на средба со авганистанските власти во обид да се откочат мировните разговори, објави денеска Асошиејтед прес (АП). Според објавеното генералот на 15 декември имал двочасовна средба со претставници на талибанската милитантна фундаменталистичка група која контролира големи делови на Авганистан и продолжува да војува против авганистанската централна влада и меѓународните сили кои сè уште се во земјата.



Мили на 16 декември отпатувал за Кабул за да разговара за мировниот процес со авганистанскиот претседател Ашраф Гани, чија влада е поддржана од меѓународната заедница, но се соочува со секојдневно насилство и длабоки поделби во авганистанското општество.


АП го цитира Мили, кој вели дека најважниот дел од дискусиите, и со двете групи, е за намалување на насилството. Според него „сè друго зависи од тоа.”



Мировните разговори меѓу талибанците и централната влада беа запрени и беа прекинати на почетокот на овој месец, три месеци откако започнаа и 10 месеци по договорот меѓу преговарачите на САД и талибанците.



Напад на талибанските сили во Авганистан, најмалку 10 загинати


Талибанците ги продолжија своите напади врз авганистански и меѓународни цели во Авганистан и бараат прекин на воздушните напади на САД, кои во последните 10 месеци требаше да бидат ограничени на поддршка за авганистанските сили.