Продолжува потрагата по деветмина исчезнати во свлечиште во Норвешка

Норвешките власти и денеска ја продолжуваат потрагата по деветмина исчезнати, три дена откако во свлечиште загина едно лице, а десетмина беа повредени.

Спасувачите се надеваат дека ќе пронајдат преживеани во местото Аск со 5000 жители, 25 километри североисточно од Осло.

„Во свлечиштето гледаме дел од зграда кој е практично неоштетен. Се надеваме дека постојат воздушни џебови и дека ќе може да пронајдеме преживеани. Сега се концентрираме на тоа“, изјави претставничката на локалната полиција Ида Мелбо Ејстесе на прес-конференција.

Спасувачите вчера најдоа еден настрадан.

Меѓу исчезнатите има две деца од две и 13 години.

Властите поради свлечиштето евакуираа 1000 луѓе кои не можат да се вратат дома поради нестабилниот терен.

Еден од повредените е во тешка состојба и е префрлен во Осло.