Уапсен жител на Вевчани поради смртни закани за Пендаровски и Заев

Полицијата го привела лицето кое на социјалните мрежи постави видео со смртни закани за премиерот Зоран Заев и за претседателот Стево Пендаровски, информираше денеска Министерството за внатрешни работи (МВР). Лицето, кое во видеото упатува смртни закани со бесење за премиерот и претседателот на државата, во видеото се претставува како „Попоски“.

„Поради постоење основи на сомнение за сторено кривично дело „загрозување на сигурноста“ и „ширење расистички и ксенофобичен материјал по пат на компјутерски систем“, на 04.01.2020 полициски службеници од ОВР Струга го приведоа Г.П.(45) од Вевчани“, се наведува во соопштението од МВР.

Брзи реакции на институциите против девијантните однесувања на социјалните мрежи

Полицијата при претрес во неговиот дом, а врз основа на наредба од судија на претходна постапка, пронашла и одзела лап-топ компјутер и други предмети поврзани со делото. По целосно документирање на случајот, велат од МВР, против него ќе биде поднесена соодветна пријава.