Кина со критики за САД откако Помпео ги укина „самонаметнатите ограничувања“ врз односите со Тајван
Огорчениот коментар на кинеската државна новинска агенција Синхуа следи по вчерашната најава на американскиот државен секретар Мајк Помпео дека ги укинува „самонаметнатите ограничувања“ на извршната власт на САД.
„Администрацијата на Трамп, во своите континуирани напори да ја запали куќата пред да ја напушти функцијата, ја премина опасната црвена линија со Кина, неколку дена пред наредниот претседател Џо Бајден да ја преземе функцијата“, се наведува во коментарот.
Американската влада во 1979 година го повлече признавањето на Тајван во корист на Кина, која го смета Тајван за дел од својата територија и се обидува да го изолира на светската сцена.
Тајванските лидери ја поздравија најавата на Помпео, која доаѓа скоро четири години по почетокот на мандатот на Трамп и помалку од две недели пред Бајден да ја преземе функцијата претседател на САД.
„Изразуваме голема благодарност до САД за поддршката на Тајван“, рече премиерот Су Ценг-чанг.
Вашингтон се уште го признава Пекинг, но одржува силни неформални односи со Тајван. Американските претставници го сметаат демократскиот остров за дел од ланецот демократски сојузници во Источна Азија.
Помпео: Комунистичката партија на Кина е предатор
Американската амбасадорка во ОН, Кели Крафт, треба да пристигне на разговори во Тајван на 13 јануари.
Помпео рече дека веќе „ги нема“ „комплексните внатрешни ограничувања“ што ги регулираат контактите на официјалните претставници на САД „во обид да го смират комунистичкиот режим во Кина“.
Уредникот на кинескиот државен весник Глобал тајмс, Ху Сиџин, во одговорот на најавата на Помпео, вели дека кинеските „борбени авиони може да летаат над Тајван во секое време“.
„Опцијата за употреба на воени средства за решавање на тајванското прашање исто така ќе биде ставена на маса“, додаде тој.