Ѓукановиќ нема да го потпише разрешувањето на двајца генерали

Црногорскиот претседател Мило Ѓукановиќ денеска соопшти дека нема да го потпише разрешувањето на началникот на Генералштабот на Армијата на Црна Гора, генерал-мајор Драгутин Дакиќ и разрешувањето и престанокот на службата на генерал-мајор Рајко Пешиќ. Наместо тоа, вели тој, ќе свика седница на Советот за одбрана и безбедност и веќе го овластил секретарот да го усогласи датумот на нејзиното одржување.

Во соопштението се потсетува дека Одлуката за назначување и разрешување на началник на Генералштабот е во исклучителна надлежност на Советот за одбрана и безбедност, кој одлуките ги донесува со консензус.

Сепак, како што наведува тој, до сега Советот за одбрана и безбедност никогаш не донел одлука за избор и разрешување на началник на Генералштабот без претходна седница на Советот.