Пресуда за „Трезор“: 8 години затвор за Мијалков, за останатите од 5 до 15 години

Судот денеска ги прогласи за виновни поранешниот директор на Управата за безбедност и контра-разузнавање (УБК), Сашо Мијалков, и поранешните високи функционери во УБК, Тони Јакимовски, Небојша Стајковиќ и Горан Грујевски „за злоупотреба на службена положба и помагање во судскиот случај „Трезор".


Сашо Мијалков е осуден на 8 години затвор,Тони Јакимовски доби 5 години, Небојша Сајковиќ 5 и Горан Грујевски, кој е во бегство во Грција, - 15 години затворска казна. Пресудата е првостепена и странките имаат право на жалба до Апелацискиот суд во Скопје.


По објавата на пресудата, обвинителот Трајче Пеливанов побара на Мијалков, да му се одреди мерка притвор. Тој образложи дека Мијалков во моментот е во притвор, за предметот „Таргет - Тврдина“, кој истекува на 27 април и побара притворот да му биде укинат за предметот за масовното прислушување, а да му се одреди за случајот „Трезор“.






Случајот „Трезор" се однесува на злоупотреба на средства од Буџетот на државата за набавка на софтвер за потребите на УБК од фирма од Велика Британија. Судијата Џенета Бегтовиќ во пресудата наведе дека од изведените докази во текот на судењето, се утврдило дека обвинетите имале средба во Велика Британија каде договориле набавка на софтверот за потребите на УБК, иако не бил објавен оглас за таа набавка.



Според пресудата, ќе се конфискуваат и 838.106 денари и 145.619 евра, од сметки на фирмата Финзи како и автомобил Ауди А4 вреден 2.026.285 денари. Дополнително, обвинетите треба и да ја надоместат штетата од 21.158.296 денари.