Столтенберг: Шпекулациите за прекројување на границите на Балканот не се од помош

Генералниот секретар на НАТО, Јенс Столтенберг по средбата со македонскиот претседател, Стево Пендаровски во Брисел изјави дека шпекулациите кои произлегоа од наводните нон-пејпери за прекројување на границите на Западниот Балкан не помагаат за стабилноста.


„Не е на мене да коментирам нешто што не сум го видел или прочитал но секоја шпекулација за промена на граници само ќе донесе повеќе неизвесност и нестабилност во регионот, шпекулациите не се од помош“, изјави Столтенберг.


Столтенбер воедно ги охрабри Бугарија и Северна Македонија да изнајдат решение за билатералниот спор и потсети дека Алијансата претставува платформа за дикусија.


„Секогаш имало разлики помеѓу сојузниците, но ние сме и платформа каде се здружуваме и се ангажираме во дијалог“, рече Столтенберг, потсетувајќи дека токму благодарение на лидерство во Скопје, Атина и Софија се постигнати договорите кои овозможија Северна Македонија да стане полноправна членка на НАТО минатата година.



ЕУ порачува: Прашањето за границите на ЗБ е засекогаш затворено
САД против прекројување на границите на Балканот


Претседателот Пендаровски порача дека и во минатото предупредил против вакви опасни идеи на поделба по етничка линија во регионот и увери дека ниеден од неговите соговорници во ЕУ или во НАТО не поддржува вакви концепти какви што содржат наводните нон пејпери. Според него, јасно е дека лицата што стојат зад овие документи и сами се срамат од напишаното со оглед на тоа дека остануваат анонимни.


Тој додаде дека според меѓународните анкети Северна Македонија е меѓу првите држави со висока поддршка за членство во Алијансата, рамо до рамо со некои од најстарите земји членки.