Еко-свест: ТЕЦ Битола испушта сулфур диоксид девет пати над дозволеното
Според податоците од извештајот, најголем проблем остануваат емисиите на сулфур кога станува збор за електраните на јаглен.
„Двата оџаци на битолската електрана, Битола Б1+Б2 (60.422 тони) и Битола Б3 (24.091 тони), остануваат најголем извор на сулфур диоксид во земјата. Ова се количини што се девет пати над она што е дозволено да емитува електраната и се повисоки од вкупните емисии на сулфур диоксид од сите електрани во Германија“, велат од Еко-свест.
Уште еден сериозен проблем се и емисиите на прашина, односно ПМ честичките. Според податоците од извештајот, со 3684 тони од ТЕЦ Битола и ТЕЦ Осломеј заедно, нивото е скоро исто како во 2019 и 2018 година – повеќе од двојно повисоко од тоа што е дозволено за земјата.
Државата нетранспарентна при давањето на концесии за користење на водите
Од Еко-свест додаваат дека според ЕУ директивите кои се пренесени и во македонското законодавство се наложува земјава да ги има намалено емисиите од големите капацитети заклучно со јануари 2018 година. Но, според извештајот, во 2020 година емисиите и понатаму се на опасно ниво, повеќе пати над дозволеното.
РЕК Битола е меѓу поопасните по здравјето на луѓето во регионот, велат од Еко-свест. Доколку емисиите биле доведени во законските граници, само во 2020 година би можеле да се спречат скоро 300 предвремени смртни случаи од рак, респираторни и кардиоваскуларни заболувања.