Први разговори на САД со талибанците по преземањето на власта

Официјални лица на Соединетите држави ќе ги одржат своите први разговори лице в лице со претставници на талибанците, по повлекувањето на САД од Авганистан и по преземањето на земјата зафатена од војна од тврдокорната исламистичка група.

Стејт департментот на 8 октомври соопшти дека делегација на САД на 9 и 10 октомври ќе се сретне со високи претставници на талибанците во Доха, Катар, каде што американските официјални лица во последните години имаа средби со талибанските преговарачи со цел да се дојде до можен мировен договор.

Талибанците поканети на разговори во Москва

„Ќе ги притиснеме талибанците да ги почитуваат правата на сите Авганистанци, вклучително на жените и девојчињата и да формираат инклузивна влада со широка поддршка“, рече портпаролот на САД. 

„Бидејќи Авганистан се соочува со изгледи за тешка економска контракција и можна хуманитарна криза, ние исто така ќе ги притиснеме талибанците да им овозможат на хуманитарните агенции слободен пристап до областите каде има потреба“, рече тој.

Средбата не покажува дека САД официјално го признаваат владеењето на талибанците во Авганистан, соопшти Стејт департментот.