ДСЗИ: Позитивни на ковид-19 да не се лекуваат дома без документ за терапија од матичниот лекар

Граѓаните кои се позитивни на ковид-19 да не се лекуваат дома ако за тоа не се изјаснил матичниот лекар и задолжително да побараат пишан документ за терапија и начин на лекување, соопшти денеска Државниот здравствен и санитарен инспекторат (ДСЗИ).



Директорката на инспекторатот д-р. Ирина Бухова вели дека апелот го упатуваат со цел да ги заштитат граѓаните и нивното здравје, стои во соопштението на ДСЗИ.



Од Инспекторатот известуваат дека добиле претставка од здравствен работник, за починато лице инфицирано со ковид-19, кое по утврдената дијагноза од матичен лекар, по 14 дена од инфекцијата, дошло во ковид центар, во многу лоша здравствена состојба и починало на само неколку часа по приемот.



Калкулирање со ковид мерките поради изборите




Блиски роднини на починатото лице, дале податок дека сега веќе починатото лице било лекувано седум дена во домашни услови со инфузиона терапија и ги навеле точните називи на лековите кои биле давани, а истите ги посочил во писмен допис и здравствениот работник кој извршил прием на пациентката каде починала, стои во соопштението.



Според сите законски прописи, испектори од ДСЗИ, веднаш по претставката на здравствениот работник, излегоа на терен и утврдија дека матичниот лекар на пациентката и препишал само таблетарна антибиотска терапија, пациентката потоа никогаш не побарала преглед или совет од матичниот лекар и дека не е познато кој, на сега веќе починатата и давал терапија и притоа не оставил никаков пишан документ или извештај.



Од тие причини, ДСЗИ случајот го пријави во Министерството за внатрешни работи.