Мерка притвор за осомничените за тероризам во Косово

Судот во Приштина денеска им изрече мерка притвор на пет осомничени за тероризам кои беа приведени во Косово минатиот викенд како дел од повеќемесечната истрага во која беа пронајдени оружје и експлозиви.

Адвокатот на одбраната рече дека приведените се осомничени за подготовка на терористички напади против уставниот поредок на Косово.


Полицијата соопшти дека пронашле значителна количина оружје, експлозиви и пари во рациите во Пеќ и Призрен на десетти октомври. Уште две лица се уапсени во следните денови  под сомнение за перење пари и финансирање тероризам.



Уапсените за тероризам во Косово пред Суд


Косовското специјално обвинителство претходно соопшти дека пет луѓе се уапсени за повеќе прекршувања меѓу кои и заговор за терористички акт.

Адвокатот на еден од приведените, дваесет и петгодишниот Нехрудин Скендери од Призрен рече дека неговиот клиент бил уапсен за слични обвиненија пред четири години, поминал месеци во притвор, но бил ослободен поради недостиг на докази.


Адвокатот на осомничениот Ардиан Ѓурај рече дека неговиот клиент е приведен само врз основа на сомневања и претпоставки. Неговиот бранител тврди дека наводите се неосновани. Ѓурај наводно бил протеран од Германија во 2015 година откако неговиот татко го пријавил кај властите.


Специјалното обвинителство на Косово го обвини Ѓурај дека давал поддршка за милитантната група Исламска држава (ИД) во периодот 2014-2015, тој во 2018 беше осуден на казна затвор од 17 месеци. Потоа Апелациониот суд ја укина пресудата.